The
Ranums'
Panat Times
Volume 1, redone Dec. 2014
The first group of secretaries
Guillaume Bochetel; Claude de l'Aubespine le père (d. 1567); Cosme Clausse; Jean du Thier; Jacques Bourdin; Jean Robertet; Claude Robertet; Claude de l'Aubespine le fils (d. 1570); Simon Fizes; Nicolas de Neufville le père; Nicolas de Neufville le fils
For the contents of the different sections, see the Introduction to this transcription
This file reproduces folios 407-431 of manuscript Cinq Cents Colbert 136.
[407] Bochetel
Guillaume Bochetel sieur de Sacy et de la Forest Thaulmier fut choisy par le Roy Francois premier entre les secretaires de ses finances pour signer les affaires d'Estat et des finances comme faisoient Jean Robertet, Villeroy, Bayard, Breton, Burgensis, et autres ausquels Sa Majesté adressoit ses commandements Sa suffisance le fit tellement considerer que le faix des affaires tombat sur luy et le secret luy fut confié.
Lors du deceds du Roy Francois premier arrivé le Dernier Mars 1547 Monsieur le Connestable de Montmorency favory du Roy Henry 2 le fit continuer au service du Roy avec Claude de Laubespine son gendre et leur adjoignit Cosme Clausse sieur de Marchaumont et Jean du Thier receveur de Sens pour signer tous quatre [407v] les affaires d'Estat privativement a tous les autres secretaires des finances, leurs appoinctemens de secretaires des finances furent en ceste consideration augmentez de trois mil livres par an chacun par patentes du 14 septembre 1547.
En lannée 1542 Monsieur Bochetel considerant le merite de Claude de Laubespine Conseiller Notaire et Secretaire du Roy Maison et Couronne de france son commis luy donna Jeanne Bochetel sa fille en mariage et le fit recevoir secretaire des finances a sa survivance l'an 1543. Mais Claude de Laubespine ayant esté pourveu d'un autre office de secretaire des finances, il remit la survivance de celuy de son beau Pere, qui maria sa seconde fille avec Jacques Bourdin aussy son commis et luy resigna son office a condition de survivance auquel bourdin fut receu le 14 juin 1549 [408] Et l'exerca sans prendre autre provisions ny prester nouveau serment apres le deceds de Guillaume Bochetel arrivé en lannée 1556. Jacques Bochetel Secretaire de la Chambre Greffier de l'ordre et Controolleur des Guerres fut pourveu de la charge de secretaire des finances en consideration des services de Guillaume Bochetel son pere le x Apvril 1556; et ne fut point secretaire d'Estat.
[409] de Laubespine
Claude de Laubespine filz de Claude de Laubespine Escuyer sieur de la Corbiliere Conseiller a Orleans puis secretaire du Roy et Marguerite le Berruier fut pourveu de la charge de Notaire et Secretaire du Roy du nombre des vixx le dixiesme Jour de Mars 1537 par la resignation de Dreux Hennequin premier president des Comptes, il estoit lors premier Commis de Guillaume Bochetel Secretaire des finances qui faisait la charge de Secretaire d'Estat.
En lannée 1543 le Roy ordonna Claude de Laubespine et Guillaume prudhomme pour signer toutes lettres et offices de finances en l'absence des secretaires des finances que le Roy avoit reduits a quatre et ordonné devoir doresnavant signer seuls les [409v] expeditions des finances et du Conseil.
Claude de Laubespine avoit espousé au mois de Janvier 1542 Jeanne Bochetel fille dudit sieur Bochetel lequel sur la fin de lannee 1543 vers Pasques le fit recevoir secretaire des finances a sa survivance, mais lannée suivante qui estoit 1544 Claude de Laubespine fut pourveu d'une charge de secretaire des finances quil exerça conjoinctement avec le sieur Bochetel et les autres secretaires des finances jusques au deceds du Roy François premier arrivé le dernier Mars 1547 auquel jour Monsieur le Connestable de Montmorency lors tout puissant aupres du Roy le choisit avec Bochetel, Clausse et du Thier pour signer privativement a tous autres secretaires les affaires d'Estat.
En leurs personnes le nombre a esté [410] reduicts a quatre qui n'a point esté depuis augmenté pour la fonction quoy que dans les premieres annees que la limitation de leur nombre fut faicte quelques uns des secretaires des finances ayent esté qualifiez secretaires des commandemens et d'Estat a cause que leurs provisions portoient cette qualité depuis ce temps les charges de Secretaires d'Estat ont tousjours esté exercées par ceux qui ont esté au lieu des sieurs Bochetel, Laubespine Clausse et du Thier soit par leur resignation ou leur deceds, ces quatre premiers secretaires d'Estat n'obtinrent pas de nouvelles provisions pour faire la charge de Secretaires d'Estat mais se servirent simplement de leurs commissions de secretaires des finances aussi ne prirent ils au commencement autre qualité que celle de secretaires des commandemens et finances, en laquelle qualité et a cause de leur reduction le Roy leur ordonna [410v] trois mil livres d'augmentation de gages oultre les xvi c[ent] xxiii lt x s quils avoient auparavant comme secretaires des finances, les lettres qui en furent expediées sont données a fontainebleau le xiiiie Jour de Septembre 1547.
En lannée 1549 Monsieur Bochetel accorda sa fille puisnee en mariage a Maistre Jacques Bourdin son commis, et en cette consideration luy resina a sa survivance la charge de secretaire des finances qu'il avoit autresfois resignée A Monsieur de Laubespine, les lettres sont donnees a Paris le 14 Juin 1549 signées Laubespine.
Le roy engagea en la mesme annee 1549 avant Pasques la vente au sieur de Laubespine secretaire des finances la ferme du huictiesme du vin vendu a Nevers, et confirma en Janvier 1549 avant pasques la vente qui luy avoit esté faicte des [411] huictiesmes de Nevers pour dix huict mil neuf cens, quarante deux livres, ledit sieur de Laubespine est seullement qualifié en ces lettres Conseiller secretaire des finances et de la chambre du Roy sieur de Russon et de haulterive. Le Roy luy donna un office de secretaire maison et Couronne de france vaccant par le deceds de Rene le Clerc duquel il fut pourveu le 17 Janvier 1551 et s'en deffit quelques temps apres.
En lannée 1557 le Roy donna une assignation sur le domaine de Bloys a Claude de Laubespine pour son remboursement de quelques sommes de deniers qui luy estoient deües les lettres ne portent encores que la qualité de secretaire des finances.
L'on void qu'en la mesme année 1557 Laubespine, Clausse et du Thiers que du Tillet qualifié du titre de Chevaliers assisterent et eurent seance [411v] en l'assemblée des Estats qui se tint en la salle de Sainct Louys au palais de Paris.
Le 29 Juillet 1558 Claude de Laubespine seigneur de Haulterive Conseiller secretaire d'Estat et des finances, Chevallier seigneur de Haulterive et Catherine d'Alison sa seconde femme firent prest au Roy de xxv m[ille] lt pour lesquelz les greffes de Tours leur furent engagez.
En lannee 1559 Claude de Laubespine Chevallier, seigneur de Haulterive Conseiller du Roy secretaire d'Estat et de ses finances fut un des deputez du Roy Henry 2 avec le Cardinal de Lorraine, Le Duc de Montmorency le Mareschal de sainct André et Jean de Morvillier Evesques [sic] d'Orleans pour la negotiation du traicté de Chasteau en Cambresis.
[412] Le 8 Juillet 1560 Claude de Laubespine filz aisné de Claude seigneur de Haulterive fut receu Conseiller Notaire et secretaire du Roy Maison et Couronne de france et le 26 Mars 1560 Secretaire d'Estat et des finances Lesdictes deux charges a la survivance de son Pere il presta le serment de secretaire d'estat present le sieur de Neufville Villeroy son beaufrere le 28 Mars 1560.
Au mois de Juillet 1560 le sieur de Laubespine acquit la Baronnie de Chasteauneuf.
Le Roy voulant en quelque façon recognoistre les longs services dudict sieur de Laubespine pere secretaire d'Estat et des finances luy fit don de la haulte Justice de Haulterive par lettres du mois de juillet 1564 et en lannee 1567 au mois de juillet pourveut de la charge de secretaire d'Estat [412v] Claude de Laubespine son filz au lieu de Maistre Jacques Bourdin son oncle nagueres decedé au moyen de quoy la survivance de sa charge quil avoit resinée a son filz luy revint pour en disposer a sa volonté comme il fit incontinent apres en faveur de Nicolas de Neufville Seigneur de Villeroy son Gendre auquel lettres de provision a condition de survivance en furent accordées par le 28 octobre 1567.
Quelque temps apres Claude de Laubespine ayant par une Infinité de services rendu sa vie signalée au dessus des plus grands Ministres de son temps deceda Comblé d'honneur le 12e Novembre 1567 laissant a sa posterité l'exemple illustre de ses vertus et de sa fidelité quils ont non seullement imitées mais de beaucoup surpassées dans les plus grands employs et les plus grandes charges de l'Estat ausquelles ilz ont esté continuellement employez jusques a present.
[413] Clausse
Cosme Clausse sieur de Marchaumont en Picardie fut premierement secretaire des finances du D'Auphin françois fils aisné du Roy François premier et apres du Dauphin son frere depuis Henry 2e du nom Roy de France lequel le lendemain de son advenement a la Couronne 1 Apvril 1547 en consideration de ses services le fit institua ordonna et establit son Conseiller et Secretaire de ses finances aux gages pention et entretenement de xvi c[ent] xxiii lt ii s vi d tournois et Lestablit avec les affaires d'Estat privativement a tous autres secretaires des finances leur ayant en cette consideration augmenté a chacun leurs gages de iii m[ille] lt par an par patentes du 14 septembre 1547.
Il deceda en lannée 1558.
Florimond Robertet sieur de fresnes fut pourveu de la Charge de secretaire d'Estat en son lieu par lettres données a _________ le _________ .
[414] Du Thier
Jean du Thier sieur de Beauregard Conseiller Nottaire et Secretaire du Roy fut faict secretaire des finances par le Roy Henry deuxiesme le 2 Jour d'Apvril 1546 Avant Pasques qui est 1547 et en presta le serment le mesme Jour. Ses provisions sont conceües en mesmes termes que celles de Maistre Cosme Clausse avec lequel et les sieurs Bochetel et de Laubespine il fut choisy pour signer les lettres de finance et d'Estat a l'exclusion de tous les autres secretaires des finances et en cette consideration les appoinctemens de secretaire des finances furent augmentez de iii m[ille] lt par an comme auxdicts sieurs Bochetel, Laubespine et Clausse par patentes du 14 septembre 1547.
Du Thier fut en si grand Credit [414v] que le Roy le fit Controolleur general des finances d'ont jay veu que la qualité luy estoit donnée par patente contenant un don que le Roy luy faict de quelque somme de l'an 1553.
Il avoit esté receu en L'office de Nottaire et secretaire du Roy Gagé, quil resigna a Guillaume Turpin de Dixiesme May 1544 et fut receu le mesme jour en un semblable Office boursier par la resignation de Pierre Sauxoy.
Le 5 May 1559 il resigna ledict Office a condition de survivance a Odet de Baillon et deceda environ le temps de cette resignation.
Florimond Robertet sieur d'Alluye fut receu secretaire d'Estat en son lieu.
[415] Bourdin
Jacques Bourdin Conseiller Nottaire et Secretaire du Roy Seigneur de Villaines Commis de Monsieur Bochetel Secretaire d'Estat fut par luy choisy pour estre Mary de l'une de ses filles et en mesme temps pourveu de la charge de secretaire des finances dudit sieur Bochetel a sa survivance il y fut receu le 14 Juin 1549 et en presta le serment le 14 juing ensuivant.
Il entra en exercice de ladicte charge lan 1556 par le deceds dudict sieur Bochetel son beaupere, il prenoit qualité de secretaire des finances auparavant le decedz de son beaupere comme l'on void par une lettre de don que le Roy luy faict de l'an 1555.
Maistre Jacques Bourdin deceda au mois de Juillet 1567 le Roy donna [415v] sa charge de secretaire d'Estat a Claude de Laubespine son nepveu dans les provisions quil luy en fit expedier il rendit tesmoignage de la satisfaction quil avoit des services du sieur Bourdin en termes tres honorables et glorieux a sa memoire elles portent, qu'estant depuis peu advenu le deceds de Jacques Bourdin Conseiller au Conseil privé Secretaire d'Estat et des finances oncle dudit de Laubespine le Jeune, jadis serviteur tres digne de cette Couronne et dont la memoire demeure celebre par l'integrité de sa vie, le Roy donne audit de Laubespine filz la charge de secretaire d'estat et des finances &a.
Les Lettres sont du huictieme de Juillet 1567.
[416] Robertet
Le Roy en consideration des services de Jean Robertet Conseiller du Roy dernier decedé son secretaire d'Estat et de ses finances, ordonna et commis florimond Robertet Notaire et Secretaire du Roy et de la chambre son fils a la signature et expedition des matieres touchant le faict des finances et despendences d'Icelles aux gages pentions et estats qui luy seroient ordonnez Donné a sainct Germain en Laye le 17 decembre 1554 le Connestable de Montmorency present signé Clausse, le serment fut presté le 24e decembre 1554 present fizes Nottaire et Secretaire du Roy.
Apres le deceds de Cosme Clausse Secretaire d'Estat et que le sieur de fresnes eust esté receu secretaire d'Estat en son lieu Jean Clausse fut faict secretaire [416v] des finances au lieu et par la resignation que ledit florimond Robertet seigneur de fresnes en avoit faicte en sa faveur aux gages de m[ille] lt les provisions sont du 25 novembre 1558 signé Bourdin.
Florimond Robertet sieur de fresnes secretaire d'estat deceda au mois d'Octobre 1567 Simon fizes fut receu secretaire d'Estat en son lieu le 22e octobre 1567 et en presta le serment a Monsieur le Chancellier le 23 octobre 1567.
Florimond Robertet sieur d'Alluy fut faict Nottaire et secretaire du Roy au membre des bourses par le deceds du sieur de fresnes et receu le 24 octobre 1567
[417] Robertet
Le Roy en consideration des services de Claude Robertet seigneur et Baron d'Alluye secretaire des finances en Normandie, et ceux de florimond Robertet seigneur d'Alluye pere dudit Claude Robertet, donna a florimond Robertet Nottaire et Secretaire Tresorier de france en Normandie son fils a sa resignation en survivance l'office de secretaire des finances aux mesmes gages dont il jouissoit donné a Blois 2 Janvier 1555 signe de Laubespine et le serment presté le 14 Janvier 1555 signé fizes.
Le jour suivant 15 Janvier 1555 il fut aussi receu Notaire et Secretaire de Roy du College des vixx au membre des gages par la resignation dudit sieur Claude Robertet son pere.
[417v] Apres le deceds de Jean du Thier Secretaire d'Estat en l'annee 1559 florimond Robertet fut receu a l'exercice de la charge de secretaire d'Estat dudit sieur du Thier.
Le Roy luy fit don en qualité de son Conseiller Secretaire D'Estat et de ses finances, et Albert de Gondi sieur du perron Maistre de la garderobbe des restes deubs par françois de Chanteleu Receveur general d'Amiens a Roussillon le 18 juillet 1564.
Il luy fit encore don d'un office de nottaire et secretaire du Roy des vixx vaccant par le Deceds de Martin bohier auquel le sieur d'Alluye fut receu 3e Janvier 1566. Il obtint encores celuy de florimond Robertet sieur de fresne vaccant par son debceds au membre des bourses auquel il fut receu le 24 octobre 1567 et le resigna a Simon Gotron le xi Avril 1568.
[418] Le sieur d'Alluye florimon Robertet secretaire d'Estat estant decedé en juillet 1569 et son office vaccant le Roy Charles 9 en fit don a Pierre Brulard secretaire des finances les lettres de don sont du 8e Juin 1569.
Son office de Nottaire et secretaire du Roy du College des vixx fut donné par le Roy a françois de postre qui y fut receu le 15 Juillet 1569.
[419] De Laubespine
Claude de Laubespine fils de Claude de Laubespine Chevalier seigneur de haulterive Conseiller Secretaire d'Estat et de ses finances fut receu secretaire d'Estat a la survivance de son pere le 26 Mars 1560 et en presta le serment deux Jours apres present de Neufville qui en signa Lacte, il fut aussy receu Conseiller Notaire et secretaire du Roy a la survivance de son pere et imma[tri]culé le 8e Juillet 1560.
Son oncle Jacques Bourdin Conseiller au Conseil privé du Roy Secretaire d'Estat et des finances estant decede en l'annee 1567 le Roy charles ix luy donna sa charge et luy et fit expedier les provisions les Lettres sont conceues en ces termes:
Les Roys nos predecesseurs ayans [419v] reconnu les services de Claude de Laubespine Chevalier Secretaire d'Estat et des finances auroient pourveu a survivance Claude de Laubespine son fils.
Et estant depuis peu advenu le deceds de Jacques Bourdin Conseiller au Conseil privé secretaire d'Estat et des finances Oncle dudit de Laubespine le jeune jadis serviteur tres digne de cette Couronne et dont la memoire demeure celebre par l'integrité de sa vie, Icelui de Laubespine avons commis ordonné et deputé audit estat et office de secretaire d'Estat et de nos finances aux droictz proffictz &a d'ont jouissent les autres secretaires d'Estat Donné a sainct Germain en Laye le 8e juillet 1567 Signé Robertet, ledict sieur de Laubespine presta le serment de ladicte charge entre les mains de Monsieur le Chancellier le 10e Juillet 1567.
[420] Claude de Laubespine ne vesquit que trois ans en la charge de secretaire d'Estat estant decedé au mois de septembre 1570. Sa charge fut donné a Maistre Claude Pinard secretaire des finances qui avoit espousé sa Cousinne Germaine Marie de Laubespine fille de Gilles de Laubespine Tresorier des parties Cazuelles.
François de Laubespine fils dudict Gilles de Laubespine fut receu en l'office de Conseiller Nottaire et secretaire du Roy vaccant par le deceix dudit sieur Claude de Laubespine le Jeune le 12 decembre 1570. Il fut faict secretaire du Conseil du Roy au mois d'octobre 1576.
[421] Fizes
Simon fizes fut premierement secretaire de Monsieur le garde des seaux comme l'on void en un don d'aubeine qui luy fut faict au mois d'Avril 1553 puis pourveu d'un office de Conseiller Notaire et Secretaire du Roy par la privation de Jacques pinatel condemné pour faulse monnoye le 27 septembre 1554 ledit Symon de fizes fut immatriculé le 28e novembre 1554.
Simon fizes fut pourveu d'un autre office de notaire et secretaire du Roy par la resignation de françois Guiot et fut immatriculé le 4 Janvier 1558.
Estant ainsi pourveu de deux semblables charges il en resina une a Louis de Laubespine qui y fut receu le 4 janvier 1558 avant pasques.
[421v] Le Roy donna a simon de fizes son Conseiller nottaire et secretaire de ses finances et de la Reyne l'estat et office de Conseiller Secretaire d'Estat et des finances de florimond Robertet seigneur de fresnes vaccant par son deceds aux mesmes gages et droicts que ceux d'ont jouissoit ledit sieur de fresnes Les Lettres sont dattées a Paris le 22 octobre 1567 Et le serment presté a Monsieur le Chancellier le 23e octobre 1567.
Il exercea ladicte charge jusques a son deceds arrivée au mois de decembre 1579 apres lequel les sieurs de Villeroy, Brulard et Pinard obtinrent du Roy la supression de sa charge et partagerent entreux son departement et ses gages de trois mil Livres avec augmentation outre lesdicts trois mil livres a partager entreux trois, de trois mil livres par chacun an sous pretexte de l'augmentation [422] de leur emploi comme il est remarqué en parlant desdicts sieurs de Villeroy, Brulard et Pinart.
Charles Dormi fut par le deceds du sieur de fizes pourveu de la charge de Conseiller nottaire et secretaire du Roy vaccante par son decedz le 8 decembre 1579.
[423] Neufville
Eschange entre le Roy et Messire Nicolas de Neufville de la Maison des Tuilleries a la seigneurie de Chantelou avant le mois de novembre 1519.
Vente a Nicolas de Neufville des Greffes du Chastelet au Vol. Depuis May 1522, jusques mars 1524.
Nicolas de Neufville Tresorier de france vol. 1524 jusques Avril 1529.
Nicolas de Neufville pere et filz survivivant [sic] secretaire des finances 1542 octobre.
Lettres par lesquelles est mandé aux Commissaires preposez sur les finances au bureau du chasteau de Louvre en presence de Nicolas de Neufville [423v] Chevallier Seigneur de Villeroy Conseiller au privé conseil ez mains duquel le Roy avoit fait tenir les clefs desdicts coffres pour en faire louverture assistans lesdicts commissaires de dellivrer ez mains de Maistre André Blondel ou son commis tresorier de l'Espargne c[ent] x [?]iiii m[ille] xi lt x s pour employer aux affaires de sa Majesté 30e decembre 1549 signé Bourdin.
Lettres impetrées par Messire Nicolas de Neufville Chevalier sieur de Villeroy Conseiller au privé conseil du Roy par lesquelles le Roy donne a Jean de Neufville notaire et secretaire sa grande bourse de la Chancellerie duquel don ledict Nicolas de Neufville s'est desmis en faveur dudit Jean de Neufville son fils a Paris 28 novembre 1549.
Permission a Nicolas de Neufville [424] secretaire des finances trresorier de l'ordinaire fils de feu Messire Nicolas de Neufville Chevallier seigneur de Villeroy Conseiller au Conseil privé de prendre le nom de legendre a cause de testament de Pierre le gendre chevalier seigneur d'Alincourt Tresorier de France oncle dudit sieur de Villeroy donné a Chantilli au mois de May 1554 signé Clausse.
[425] Neufville
Nicolas de Neufville le Jeune fut faict secretaire des finances a la survivance de Nicollas de Neufville son pere les lettres portent que cestoit en consideration des services de Nicolas de Neufville Chevallier sieur de Villeroy Conseiller au conseil privé son ayeul continuez par Nicolas de Neufville a present Nicolas le gendre sieur de Villeroy secretaire des finances son pere elles sont données a Paris le 16 Juin 1559 le sieur de Villeroy son pere le fit aussy recevoir Conseiller Notaire et Secretaire du Roy a sa survivance le mesme mois de Juin 1559 et luy l'aissa l'exercice entier et les bourses dudict office le 22 octobre 1560.
Nicolas de Neufville le Jeune [425v] Conseiller Notaire secretaire du Roy et secretaire des finances ayant espousé Magdelaine de Laubespine fille de Claude de Laubespine premier secretaire d'Estat fut pourveu de la charge de secretaire d'Estat a la survivance dudict sieur de Laubespine par lettres donnees a Paris le 28 octobre 1567
Il presta le serment entre les mains de Monsieur le Chancellier le jour suivant.
Le sieur de Laubespine pere avoit en lannée 1560 fait recevoir Claude de Laubespine son fils aisné en la mesme charge de secretaire d'Estat a la survivence, lequel ayant esté gratifié par le Roy de la charge de secretaire d'Estat vaccante par le deceds de Jacques Bourdin son oncle decedé l'an 1567 il remit a son pere la survivance de sa charge, [426] lequel comme j'ay dit en fit pourvoir ledit sieur de Villeroy son gendre Le sieur de Laubespine pere estant decedé le 12 Novembre 1567 Nicolas de Neufville exerça la charge de secretaire d'Estat en vertu de ses provisions en survivance.
Apres le deceds de simon fizes Baron de Sauve l'un des quatre secretaires d'Estat les trois autres sçavoir Villeroy, Brulard et Pinard obtinrent la suppression de sa charge et partagerent entreux son departement ils se firent attribuer les mil escus de gages quil avoit qui estoit a chacun iii c[ent] xxxiii lt 2 tiers et en outre mil escuz daugmentation chacun a cause de laugmentation de leur employ le Roy leur en accorda lettres pattentes presentées a la Chambre des Comptes qui les refusa sur ce quelles n'estoient en forme de Charte, le Roy fit expedier des lettres [426v] de Charte au mois d'Octobre 1582 lesquelles presentées a la chambre elle donna arrest d'enregistrement pour jouir par lesdicts sieurs de Villeroy, Brulard et Pinart des mil escuz de gages dudict sieur de sauve tant que la suppression dureroit surquoy le Roy ayant faict tres-expres commandement de les registrer purement elles furent registrees pour jouir par chacun desdicts sieurs secretaires d'Estat desdictz xiii c[ent] xxxiii lt un tiers d'augmentation de gages outre les mil escuz de premiere augmentation attribuez a la charge de secretaire d'Estat en lannée 1547 tant que lesdictz sieurs tiendroient lesditz estatz et que la supression dureroit. Larrest est du 5 decembre 1582.
Messire Nicolas de Neufville seigneur de Villeroy secretaire d'Estat ayant servy avec beaucoup de soing et d'assiduité depuis sa reception en [427] l'annee 1567 desira se descharger d'une partie des soins de sa charge et choisit Claude de Laubespine sieur de Verderonne secretaire des commandemens de la Reyne mere de laquelle il avoit espousé la cousine germaine en faveur duquel il obtint du Roy de pouvoir resigner sa charge de secretaire d'Estat a condition de survivance avec reserve sa vie durant des gages entiers ce que le Roy luy accorda par lettres du premier Mars 1587 et ledit sieur de Laubespine en presta le serment entre les mains de Monsieur le Chancellier le 12 Apvril 1587.
Monsieur de Villeroy las du travail et de l'embaras auquel estoient lors les affaires d'Estat tesmoigna desirer de se retirer et laisser l'exercice entier de la charge de Secretaire d'Estat au sieur de Laubespine il en presta fort au Roy qui ne la luy voulut [427v] permettrre mais pour le souslager luy accorda que le sieur de L'aubespine exerceroit conjoinctement la charge avec luy tant pour la signature que pour les autres fonctions sans que pour cette permission l'on peult pretendre par le decedz de l'un deux ladicte charge avoir esté desmembrée ny qu'elle peut estre dicte vaccante les lettres qui en furent expediées sont données a chartres le douzieme jour d'Aoust 1588 et registrees a la Chambre des Comptes de Paris.
L'effect de ces lettres ne fut pas de long durée Le Roy Henry 3 ayans esloigné le sieur de Villeroy de la Cour et le sieur de Revol pourveu de sa charge de secretaire d'Estat le 15 septembre 1588.
Le subject de la disgrace du sieur de Villeroy merite d'estre remarque. [428] La faction de Guise s'estoit tellement fortiffiée contre la maison de Bourbon et la propre personne du Roy qu'il fut contrainct de s'enfuir de Paris le jour des Barricades ayant a peine eu le Loisir de monter a cheval pour se retirer a Chartres ou il resolut en luy mesme de faire mourir le Duc de Guise jugeant que c'estoit la seule voye qui luy estoit ouverte pour l'empescher de parvenir au but de ses affaires qui tendoient a le priver de sa Couronne et soubz pretexte du zele qu'il avoit de ruisner les Huguenots s'establir dans le trosne Royal, le Roy ne voulut descouvrir son dessein a personne et entra en deffiance de tous ceux qui l'approchoient apprehendant quilz ne penetrassent sa pensée et ne la descouvrissent, le sieur de Villeroy comme un des plus habiles de son Conseil fut celuy lequel il prit resolution desloigner des premiers [428v] et lavoit tousiours fidellement servy, mais alors il se d'effioit de luy craignant que le zele quil avoit pour la religion Catholique et la haine quil portoit au Duc despernon avec lequel il avoit eu querelle l'année precedente n'inclinassent ses sentimens pour la Maison de Guize. Les sieurs Bruslard et Pinart secretaires d'Estat luy estoient pareillement suspects, et despité contre soy mesme se croyoit environné de toutes parts de Ministres passionnez et interessez, il s'offençoit de ce quils savoient trop et blasmoit cette profonde cognoissance quilz avoient des choses de la Cour par le moyen de laquelle ilz penetroient jusques dans les fonds de ses pensées, ce qui luy remettoit en memoire l'Exemple de son Ayeul, qui vers la fin de son Regne avoit esloigné de luy tous ses vieux Ministres qui pour estre habiles luy estoient rendus suspects, se [429] servant en leur place de personnes plus considerables pour leur probité que pour leur bon Esprit, desquelles il recevoit en effect de meilleurs et plus utiles services que de ces autres qui avoient vieilly dans l'experience des affaires, et dont la prudence estoit raffinée. Sur ceste pensée a mesme temps quil fut party de Chartre pour sacheminer a Blois, ou il avoit resolu d'executer ses desseins, il fit retirer de la Cour les sieurs Pinart et Brulard anciens secretaires d'Estat cela faict il envoya a Benoise secretaire du Cabinet auquel il se fioit fort, avec ordre expres le dire au sieur de Villeroy, au Chancelier de Chiverny et au sieur de Bellievre qui s'en estoient allez en leurs maisons, pour y donner ordre a leurs affaires, afin de s'en retourner que le Roy satisfaict de leurs services passez, leur commendoit de ne plus revenir a la Cour [429v] Le sieur de Bellievre receut ce commandement avec une grande moderation, et se monstra prompt a lexecuter, Le Chancelier tascha de se justiffier, mais en vain pour pouvoir suivre la Cour, et quelque obeissant que Monsieur de Villeroy se monstrast il tesmoigna neantmoins que cette disgrace luy estoit fort sensible, luy semblant que ce longs travaux, et les services par luy rendus avec tant de bons succez estoient mesprisez sans raison, et trop ingratement recognus, Le Roy comme c'est la coustume, fit garde de seaux a la place du Chancelier françois de Monthelon advocat au parlement de Paris, homme d'une grande integrité et dont les intentions alloient droict, mais qui n'estoit pas encores bien accoustumé aux affaires du Gouvernement, où jusques a ce jour la il n'avoit eu que fort peu d'employ, ou point du tout [430] par mesme moyen il crea secretaire d'Estat Martin Ruzé, seigneur de Beaulieu, et Louys de Revol, hommes fideles, de saine reputation, desinteressez, et accoustumez a le servir des leurs premieres années, bien que toutesfois en matiere d'affaires de Cour et de Conseil, ilz neussent jamais passé pour habiles, apres que cela fut faict, il sembla au Roy, comme il disoit luy mesme avoir esté d'aupres de luy des yeux de Renards, et pourveu au moyens les plus asseurez pour estre bien et fidellement servy a ladvenir, en empeschant que ses Ministres n'eussent que le pouvoir quil leur donneroit, et non pas la curiosité de penetrer plus avant dans ses desseins.
L'esloignement du sieur de Villeroi de son employ ordinaire pres du Roy, le lia avec Monsieur [430v] du Maine quil assista de ses conseils non comme les factieux et ceux de la ligue pour la subversion de Lestat mais seullement pour la conservation de la Religion Catholique, en sorte que le Roy Henry 4 ayant abjurré l'heresie a Chartres il fut un de ceux qui par ses conseils et son exemple contribua le plus a la reunion generale de tous les françois sous l'obeissance de leur Roy et a les faire despartir des intelligences quils avoient avec les Estrangers, Aussy le Roy Henry 4 juge tres suffisant de son merite et de l'integrité de sa vie le rappela en son Conseil et luy donna en lannée 1594 la charge de Secretaire d'Estat du sieur Revol vaccante par son debceds laquelle il exercea depuis avec te mesme soin et vigilance quil avoit faict auparavant comme je le remarqueray apres, avoir parlé de [431] ceux qui furent establis secretaires d'Estat jusques a son restablissement.
Martin Ruzé sieur de Beaulieu fut pourveu le 4 may 1589 a [sic] jours de l'office de Nottaire et secretaire du Roy du sieur de Villeroy lequel entra depuis en son office par le commandement du Roy.