The
Ranums'
Panat Times
Volume 1, redone Dec. 2014
The third group of secretaries
Pierre Forget; Nicolas Neufville de Villeroy; Antoine de Loménie; Pierre Brulard de Puisieux
For the contents of the different sections, see the Introduction to this transcription
This file reproduces folios 455-474 of manuscript Cinq Cents Colbert 136
[455] Forget
Pierre Forget obtint du Roy les provisions de l'office de secretaire des finances (ou du Conseil) par la resignation de Pierre Clausse qui l'avoit eu de Claude Burgensis sieur du Goguier avec commission expresse de tenir le registre signer et expedier touttes les expeditions concernans les finances qui seroient resoluës par les gens du Conseil privé. Lesdictes provisions sont du x decembre 1577 aux gages de iiii c[ent] escus.
Les sieurs de Beaulieu et Revol ayans esté commis par le Roy henry trois au lieu des sieurs de Villeroy, Brulard et Pinart au mois de septembre 1588 pour exercer les charges de secretaires d'Estat dont ils avoient esté privez, lesdictz sieurs de Beaulieu et Revol demanderent au Roy quelques mois apres d'estre deschargez d'une partie du faix des affaires, et que lon leur adjoignit les sieurs potier intime ami du Sieur Ruzé et forget parent du sieur de Beaulieu, tous deux secretaires du Conseil, ce que le Roy leur accorda et pourveut le 22e jour de febvrier 1589 lesdicts sieurs Potier et forget chacun d'une charge de Secretaire d'Estat, restablissant par ce moyen le nombre des secretaires d'Estat a quatre comme il estoit avant le deceds du sieur de fizes en l'année 1579. La necessité en laquelle estoient les affaires du Roy l'obligerent a demander auxdictz sieurs Potier et Forget xv m[ille] escus chacun lesquels ils luy baillerent dont ils se firent depuis rembourser.
Le Roy fit lors un grand reglement pour les charges de secretaire d'Estat qu'il restablit au nombre de [456] quatre sans pouvoir estre augmenté et prescrit la forme du serment quils feroient doresnavant beaucoup plus ample qu'ils n'avoient auparavant accoustumé de le faire, avec relation audit reglement et promesse de Lobserver.
Pierre forget fut faict secretaire du Roy maison et Couronne de France du College des vixx par le deceds de ....... de Boursies le 9 octobre 1589.
Pierre Forget sieur de fresnes estoit un des plus habiles hommes de son temps Il avoit l'esprit vif et prompt qui ne pouvoit souffrir de contradiction.
Cela le porta plusieurs fois a se depiter contre son employ et a dire qu'il vouloit se retirer (8) et se deffaire de sa charge. Cela luy arrivoit ordinairement quand le Roy luy avoit dit quelque chose qui ne luy avoit pas pleu.
[456v] En L'année 1608 soit qu'il fut en cholere ou que veritablement il voulust se deffaire de sa charge, il en traitta avec Monsieur de Chasteauneuf qui estoit lors Monsieur de Preaux pour soixante mil escus dont ils signerent le traicté qui fut mis entre les mains de Monsieur jeannin qui en a esté depositaire plus de deux ou trois ans.
La pensee de Monsieur de fresnes estoit de mettre Monsieur de preaux en son alliance et luy baillant sa charge l'obliger a espouser la fille du sieur forget Baudry Tresorier de france a Tours son parent et heritier qui avoit espousé sa fille naturelle, d'un autre costé Madame de Fresnes souhaittoit qu'il espousast [457] Mademoiselle de Sagenne sa niepce. Cet intrigue fit differer l'execution du traitté soit pour le faire recevoir seulement en survivance Monsieur de preaux purement et simplement secretaire d'estat ou pour le faire recevoir seulement en survivance. Durant ce temps le Reyne qui s'establissoit dans l'esprit du Roy et y prenoit credit, et vouloit advancer les siens demanda au Roy la premiere charge de secretaire d'Estat vaccante pour Monsieur de Pontchartrain secretaire de ses commandemens que le Roy luy accorda, ensuitte de quoy elle envoya querir Monsieur de preaux et le pria de se desister en faveur de Monsieur de Pontchartrain du traitté qu'il avoit faict avec Monsieur de fresnes et qu'elle l'obligeroit en d'autres rencontres plus importantes, il n'y avoit pas d'apparence que Monsieur de preaux dist a la Reyne qu'il ne le vouloit pas faire. Il luy fit [457v] neantmoins un compliment qui ne signifioit rien de precis mis seulement qu'il seroit tousiours tres heureux de luy rendre service et de luy obeir comme il y estoit obligé. Le Roy sceut ce qui s'estoit passé et tesmoigna n'estre pas content du desistement que la Reyne desiroit de Monsieur de preaux, et qu'il vouloit qu'il fust secretaire d'Estat lequel il l'envoya Ambassadeur en flandre ou il demeura jusques en l'année 1610 durant lequel temps le traitté qu'il avoit faict avec Monsieur de fresnes demeura tousiours entre les mains de Monsieur Jeannin.
Cependant Monsieur de fresnes qui avoit resolu de mourir secretaire d'Estat quelque tesmoignage qu'il donnast au contraire ne donnoit point sa demission a Monsieur de pontchartrain qui l'en pressoit continuellement et avoit obtenu [458] par les prieres de la Reyne l'agreement du Roy, enfin il tomba tellement malade que les medecins jugerent qu'il n'en pouvoit eschaper. Si Monsieur de Fresne fust decedé avant que d'avoir faict agreer quelqu'un de sa part, il y avoit apparence de croire que Monsieur de pontchartrain eust esté gratifié de sa charge, il eust peut estre attendu que cela fust arrivé quand par hazard Monsieur de preaux arriva a Paris estant venu en poste de Bruzelles pour parler au Roy touchant l'affaire de Monsieur le Prince, le Roy ayant voulu luy dire de bouche ses sentimens sur ce sujet, Monsieur de Pontchartrain s'imagina que Monsieur de preaux ayant sceu la maladye de Monsieur de Fresnes s'asseurant de la bonne volonté du Roy estoit venu expres pour avoir sa charge ce fut pourquoy comme sage voulant empescher la [458v] concurrence il ne songea pas a mesnager sa bourse mais redoubla ses sollicitations envers la Reyne, et employa ses amis affin que Madame de Fresne luy fist bailler la demission de son mari qui jusques alors n'en avoit point voulu ouyr parler, il y fut enfin porté par les prieres de sa femme qui desiroit s'asseurer le prix de sa charge et signa sa demission en faveur de Monsieur de pontchartrain qui paya soixante mil escus Comptant, et le lendemain Monsieur de Fresnes deceda. Monsieur de pontchartrain obtint sur cette demission les provisions de la charge de secretaire d'Estat le 16e Avril 1610 et en presta le serment entre les mains du Roy le mesme jour.
Quant a Monsieur de preaux le Roy le continua en ses emplois et apres son deceds le Roy Louis treze [459] son fils luy donna plusieurs Ambassades importantes jusques a ce que le jugeant Capable de la plus grande administration dans l'Estat il le fit garde des seaux de france apres la disgrace de Monsieur de Marillac.
[460 ]Neufville
Par le deceds du sieur de Revol lan 1594 la charge de secretaire d'Estat estant demeurée vaccante, le Roy en gratiffia de nouveau Nicolas de Neufville seigneur de Villeroy qui fut establi en ladicte charge le 30e decembre 1594.
Il rentra pareillement en son office de secretaire du Roy du College des vixx dont Martin Ruzé sieur de Beaulieu secretaire d'Estat avoit esté pourveu le 4 may 1589.
Pierre Brulard vicomte de Puisieux espousa Madelaine de Neufville fille du sieur de Villeroy lequel le fit recevoir a sa survivance en la charge de Secretaire d'Estat le 4 jour de Mars 1606 pour l'exercer conjoinctement avec luy.
[460v] Le Mareschal Dancre ayant esloigné des affaires le sieur de Puisieux en l'annee 1616 appella au Conseil Claude Mangot president a Bordeaux et luy fit donner la Commission pour exercer la charge de secretaire d'Estat dudit sieur de Puisieux, les lettres sont de 9 jour d'Aoust 1616, extraordinaires pour la forme et la teneur elles portent que le sieur de Puisieux pourveu a la survivance du sieur de Villeroy s'estant par le commandement qui luy avoit esté faict esloigné du Roy et departie de l'exercice et fonction de sa charge et que le Roy ayant consideré que ledit sieur de Villeroy n'avoit peu depuis quelques annees vacquer si assiduellement a ladicte charge comme il eust esté bien requis a cause de son ancien age, et aussi que outre l'exercice d'Icelle le Roy l'employoit continuellement en autres affaires les plus importantes de l'estat pour la grande experience qu'il [461] sy estoit acquis et qu'il avoit pour cette occasion besoin d'estre soulagé en ladicte charge comme il avoit esté par ledit sieur de puisieux au lieu duquel il estoit besoin de commettre quelqun qui eust les qualitez requises et dont la fidelité fust connue et assurée pour cette cause il commettoit et ordonnoit a l'exercice et fonction de ladicte charge de secretaire d'Estat et de ses commandemens et finances (9) ledit sieur Mangot pour en jouir aux honneurs &a, ainsi qu'en jouissoit ledit sieur de puisieux, et pour signer par ledit sieur de Villeroy et Mangot conjoinctement ou separement en presence ou en labsence l'une de l'autre touttes expeditions concernant ladicte charge mesmes celles du taillon et de la gendarmerie ainsi qu'il se pratiquoit entre lesdicts sieurs de Villeroy et de puisieux aux gages et appoinctemensde xvii m[ille] lt sans toucher aux appoinctemens du sieur de Villeroy qui luy [461v] demeureroit entiers.
Le sieur Mangot ayant quelques mois apres esté faict garde des seaux une commission semblablement a celle qui luy avoit esté donnee fut expediée a Armand Jean du Plessix de Richelieu Evesque de Lusson le dernier novembre 1616 pour exercer la charge de secretaire d'Estat comme faisoit ledit sieur Mangot.
Apres le Deceds du Mareschal d'Ancre les sieurs de Villeroy et de Puisieux furent restablis et Monsieur l'Evesque de Luçon esloigné de la Cour par lettres de mespris du dernier Apvril 1617 tant contre ledit sieur Evesque que le sieur Mangot qui fut mis a la Bastille. Lesdictes lettres registrees a la chambre des Comptes le 24 May 1617.
[462] Lomenie
Anthoine de Lomenie parisien estoit fils de Martial de Lomenie Escuyer seigneur de Versailles et de la grange Lessard receu Conseiller Secretaire du Roy de 26 Aoust 1552, Secretaire des finances le 8 aoust 1557 et ensuitte Greffier du grand Conseil.
Il fut tué a la sainct Barthelemy l'an 1572 ayant esté premierement mis prisonnier et obligé de resigner ses charges et passer vente de ses biens avec promesse de luy sauver la vie laquelle ne luy fut tenuë. Il estoit petit filz de Louys de Lomenie Escuyer, sieur dudit lieu et de la Faye en Limosin et d'Alienor (10) de Preuilly et fils d'Amery de Lomenie Escuyer aussy sieur (11) dudit lieu et de la Faye et de Claude du Val.
[462v] Par son deceds sa famille fut entierement ruinée, l'Exemple de sa vertu fut le seul et unique partage de ses enfans, lesquels chercherent leur subsistence en divers employs attendant que la fortune fust changée.
En lannee 1574 le Roy Henry quatriesme lors seulement Roy de Navarre se souvint que Martial de Lomenie avoit esté un de ceux qui l'avoient servy et ses predecesseurs avec plus de passion et de fidelité et desirant le recognoistre envers ses enfans il s'enquit de leur employ et fit venir pres de luy Anthoine de Lomenye qu'il mit chez Monsieur ................ (12) Secretaire de ses commandemens attendant que les occasions se presentassent pour l'employer selon son merite.
En l'annee 1581 il le pourveut de la charge de son Conseiller et secretaire [463] ordinaire, les lettres de provision sont en ces termes
Henry, &a Roy de Navarre, &a savoir faisons que nous bien records et memoratif des bons et agreables services que feu Mer (13) Martial de Lomenie en son vivant Secretaire des finances du Roy Monseigneur et Greffier en son grand Conseil avoit faict au feuz Roys de Navarre Henry (14) et Anthoine nos Ayeul et pere et a la feuë Reyne nostre mere en l'Estat de Conseiller et secretaire a la suite de la Cour et depuis son deceds notre cher et bon Amé Anthoine de Lomenie son filz ayant esté par nous employé soubz aucuns de noz Secretaires des commandement se seroit rendu capable de nous servir a l'advenir par quoy desirants recognoistre les services de sondit feu pere et les siens &a luy avons donné l'Estat de l'un de noz conseillers et secretaires ordinaires &a, aux gages audict Estat apartenants, &a [463v] Donné a Nerac 1 Aoust 1581 avec le serment dudict jour.
Le Roy henry 4 estant parvenu a la couronne de France continua les tesmoignages de sa bonne volonté a Anthoine de Lomenie et luy donna un office de Notaire et secretaire vaccant par le decedz de Ludovic d'Adjaceto d'ont il fut pourveu le 1 May 1593 il luy donna pareillement la charge de secretaire de ses commandemens de Navarre et Ancien Domaine au lieu de ............. et en cette qualité luy augmenta ses appoinctemens de xii c[ent] lt par an par lettres de 23e decembre 1599.
Il fut aussy pourveu de la charge de grand Audiencier de la Chancellerie de france qu'il resigna a Jean Coulon le premier juillet 1601.
Ayant esté faict secretaire du Cabinet [464] de sa Majesté il exercea cette charge avec beaucoup d'assiduité en sorte que le Roy le jugeant digne des plus grands emplois le fit Conseiller en son Conseil d'Estat aux appoinctemens ordinaires. Il resina depuis cette charge de secretaire du Cabinet a Henry de Lomenie son fils qui en fut pourveu.
Martin Ruzé sieur de Beaulieu Secretaire d'Estat et des commandements et finances de sa Majesté demanda au Roy pour son soulagement en sa vieillesse que ledit sieur Anthoine de Lomenie fut receu Secretaire d'Estat a sa survivance pour exercer la charge conjoinctement avec luy a condition que sa vie durant ledit sieur de Lomenie ne jouiroit daucuns gages et appoinctemens de la charge mais qu'ils appartiendroient entierement audit sieur de Beaulieu ce que le Roy luy accorda en consideration tant de ses services que de ceux dudict [464v] sieur de Lomenie. Les lettres sont données a Paris le 3 Mars 1606 et le serment dudit sieur de Lomenie presté au Roy le x jour de Mars 1606. Ainsy ledit sieur de Lomenye fut faict secretaire d'Estat exercant la charge conjoinctement avec ledit sieur de Beaulieu jusques au deceds dudit sieur de Beaulieu arrivé au mois de Novembre 1613.
Anthoine de Lomenie avoit faict recevoir le 25 octobre 1612 Henry de Lomenie son fils Secretaire du Roy du College des six vingts a sa survivance et obtenu lettres pour luy en faire faire (15) les fonctions et signer a la suitte du Roy en son absence le 8 may 1613 il obtint encores Brevet du Roy a Fontainebleau le x octobre 1613 par lequel il luy accorda de pouvoir resigner a sa survivance la charge de secretaire des commandemens de Navarre en faveur dudict sieur [465] Henry de Lomenie son fils, sur lequel Brevet lettres patentes furent expediées le mesme jour confirmatives dudit Brevet et le serment presté par ledict sieur Henry de Lomenie entre les mains de Monsieur le Chancellier.
Au mois de Janvier de l'année 1615 ledit sieur Anthoine de Lomenie secretaire des commandemens de france et de Navarre exerceant lesdictz deux charges (16) acquit par la permission du Roy conjoinctement avec François de Lomenie Ravannes son nepveu aussy secretaire des commandemens de Navarre la charge de Maistre Jean Pancheure sieur [465v] de Lamberdiere troisiesme secretaire d'Estat de Navarre laquelle charge ils reunirent aux leur pour jouir des appoinctemens par augmentation de ceux qui appartenoient a leurs charges ainsy que faisoit ledit sieur de Lamberdiere les lettres qui en furent accordées sont données a Paris au mois de Janvier 1615 en vertu desquelles ilz ont depuis jouy desdicts appoinctemens.
Le sieur de Lomenie desirant que Henry de Lomenie son fils fut instruit de ses premieres années en la charge de secretaire d'Estat obtint du Roy en l'année 1615 pour la charge de secretaire d'Estat de France la mesme faveur que celle qu'il avoit obtenuë en l'année 1613 pour celle de secretaire d'Estat et de Navarre.
Par Brevet donné a Paris le xe jour d'Aoust 1615 le Roy luy accorda de pouvoir resigner la charge de secretaire d'Estat et de ses commandemens et finances de france a condition de survivance audit sieur Henry de Lomenie son fils Conseiller Secretaire du Roy maison et [466] Couronne de France des Commandemens et finances de Navarre et du Cabinet de sa Majesté avec pouvoir de signer toutes sortes de depesches et autres expeditions et faire la fonction de ladicte charge par ledit filz lors de l'absence de son pere seulement, lettres patentes de provisions furent expediées le mesme jour conformes audit brevet et ledict Sieur Henry de Lomenie presta le serment au Roy le xiie jour desdictes mois et an.
Apres la reunion du Royaume de Navarre et souveraineté de Bearn a la Couronne de France en l'annee 1621 les charges des officiers du conseil de Navarre demeurans sans fonction et supprimées le Roy ne Jugea pas raisonnable que les services rendus par lesdicts sieurs de Lomenie pere et fils demeurassent sans recompense [466v] et d'autant qu'elle et ne pouvoit estre faicte pour la necessité de l'Estat, brevet leur fut accordé le Roy estant a Chizey le 29 May 1621 par lequel il declara qu'il vouloit que nonobstant l'union de la Couronne de Navarre a Celle de France les sieurs de Lomenie pere et fils jouissent leur vie durant des gages et appoinctemens ont ils jouissoient auparavant a cause de leurs charges de secretaires d'Estat de Navarre.
Tous ces temoignages de bonne volonté de Roys Henry 4 et Louis xiii ont continué envers les sieurs de Lomenie jusques a son deceds arrivé le 17 janvier 1638 avec l'estime de tout le monde et l'approbation universelle de la conduitte de sa vie.
Les biens mediocres qu'il a laissez ont faict clairement voir que le titre dont le Roy le qualifioit n'estoit pas sans fondement l'appellant [467] par recommandation particuliere l'homme de bien, aussy toute sa vie n'a elle esté employée qu'a servir son prince dont il a tousjours preferé les interests aux siens propres.
Par son testament du ............... il desire que Monsieur de Villeauxclercs son fils rapportast a sa succession la somme de CL m[ille] lt pour la charge de secretaire d'Estat dont il estoit pourveu a sa survivance. A quoy ledict Sieur son fils s'accorda apres son deceds plus pour l'affection qu'il portoit a Mesdames les Marquises de Rotelin et de Mirabeau ses soeurs que pour obligation qu'il y eust de sa part: les charges (17) de secretaire d'estat luy ayant esté accordée a la survivance de son pere pour les services qu'il avoit desja rendus et ceux qu'il estoit en estat de rendre et non en consideration des filles.
[467v] Anthoine de Lomenie avoit espousé en l'année 1592 Anne d'aubourg fille de Charles d'aubourg Chevallier seigneur de Pourcheux de laquelle il eust trois enfans assavoir Henry Auguste de Lomenie Chevallier seigneur de la Villeauxclercs, ............. de lomenie femme de .................... D'Orleans Marquis de Rotelin, et ................ de Lomenie mariée en premieres nopces a .............. Et en secondes a .............. Chabot Marquis de Mirabeau. Anne D'aubourg estant decedé l'an ......... laissa Anthoine de Lomenie son mari veuf qui n'a point depuis esté remarié.
[468] Brulard
Pierre Brulard vicomte de puisieux estoit fils de ..... Brulard Marquis de Sillery Chancellier de france et petit fils de Noel Brulard procureur general au parlement de Paris puis president au Mortier.
Pierre Brulard vicomte de Puisieux espousa en premieres nopces Madelaine de Neufville petite fille de Messire Nicolas de Neufville Chevallier seigneur de Villeroy secretaire d'Estat, lequel le fit recevoir secretaire d'Estat a sa survivence le 4 jour de mars 1606. Il en presta le serment au Roy le .... 1606 pour exercer ladicte charge conjoinctement avec ledit sieur de Villeroy auquel les gages et appoinctemens furent reservez sa vie durante.
[468v] Le sieur de Puisieux fut disgracié par le Mareschal d'Ancre en l'année 1616 avec Monsieur le Chancellier de Sillery son pere et commission donnée a Monsieur Mangot premier president au parlement de Bordeaux le 9 aoust 1616 pour exercer la charge de secretaire d'estat en son lieu conjoinctement avec le sieur de Villeroy en la presence ou en l'absence l'un de l'autre jusques a ce qu'il en eust esté autrement ordonné par le Roy, avec xvii m[ille] lt d'appoinctemens compres ii m[ille] lt que ledit sieur Mangot touchoit avant sa commission comme conseiller d'Estat.
Le sieur Mangot ayant esté fait garde des seaux par l'esloignement de Monsieur du Vair quelques mois apres qu'il eust esté commis a faire la charge du sieur du Puisieux Armand Jean du Plessix de Richelieu Evesque de Luçon fut commis pour exercer la [469] charge de secretaire d'Estat conjoinctement avec Monsieur de Villeroy non comme avoit faict Monsieur Mangot d'ont les provisions portoient que c'estoit jusques a ce qu'il en eust esté autrement ordonné par le Roy, mais sans limitation, avec revocation de la survivance du sieur de puisieux arrivant le deceds du sieur de Villeroy.
L'Evesque de Lusson fit la charge de secretaire d'Estat jusques au mois d'Avril 1617 que le Mareschal d'Ancre fut tué, ce qui eloigna ceux qu'il avoit establis au Conseil entre lesquels fut l'evesque de Lusson qui se retira en Avignon ensuitte de quoy le sieur de puisieux fut restabli en sa charge de secretaire d'estat pour lexercer comme il avoit faict au paravant sa disgrace conjoinctement avec le sieur de Villeroy.
L'exemple des sieurs Mangot et de Lusson qui avoient obtenu xvii m[ille] lt [469v] d'appoinctement pour l'exercice de la commission de secretaire d'Estat luy servit pour obtenir pareille gratification, comme il fit par lettres patentes du 24 May 1617 Registrees a la chambre des Comptes, dans lesquels xvii m[ille] lt il fit entrer ii m[ille] tant de livres qu'il avoit d'appoinctement comme Conseiller d'Estat. Ces lettres qui portoient le restablissement des sieurs de Villeroy et de Puisieux estoient fort a leur advantage et a grand mespris pour les sieurs Mangot et de Lusson.
Apres le deceds du sieur de Villeroy arrive le ........... le sieur de Puisieux feut seul titulaire de la charge de secretaire d'Estat qu'il exerca jusques en l'annee 1624 que pour la derniere fois Monsieur le chancelier de sillery son pere fut disgracié et faict prisonnier, et commandement au sieur de puisieux de se retirer, Sa charge de secretaire d'Estat [470] fut donne a le Beauclerc intendant des finances lequel en fut pourveu purement et simplement le 5 febvrier 1624. L'on offrit au sieur de puisieux de luy donner cinquante mil escus de recompense d'ont il avoit brevet s'il vouloit donner sa demission, par plusieurs fois lon le luy reitera du vivant du sieur de Beauclerc ce quil refusa toujours de faire dans lesperance quil avoit conceüe que par quelque changement a la Cour il pourroit estre restabli, comme il luy estoit desja arrivé.
Le sieur de Beauclerc decedé en l'année ........ lon fit Monsieur Servien secretaire d'Estat a condition qu'il bailleroit xl m[ille] escus aux herittiers du sieur le Beauclerc et ii c[ent] m[ille] lt a Monsieur de puisieux encores que son brevet ne fust que de CL m[ille] lt. Monsieur le garde des seaux de Chasteauneuf qui avoit faict choisir Monsieur [470v] Servien pour estre secretaire d'estat eut le soin de conserver les interests de Monsieur de puisieux, et tira de Monsieur Servien promesse de ii c[ent] m[ille] lt en sa faveur que Monsieur de puisieux ne voulut agreer, ny bailler sa demission quoy que l'on proposast outre la recompense de luy conserver son rang au conseil des despeches, et mesmes de luy faire donner l'ambassade de Rome Cependant Monsieur Servien fut mis en possession de la charge de secretaire d'Estat ayant payé xl m[ille] lt aux herittiers du sieur le Beauclerc et baillé sa promesse de ii c[ent] m[ille] lt qui est demeuré plus de deux ans entre les mains de Monsieur de Chasteauneuf jusques a sa disgrace, durant laquelle le sieur de Puisieux estant decedé en l'annee ......... ses herittiers toucherent les ii c[ent] m[ille] lt des deniers de Lespargne.
[471] Potier
........... Potier sieur de Seaux fils de Louis Potier sieur de Gesvre Conseiller du Roy en ses conseils Secretaire d'estat et de ses commandemens et finances fut receu secretaire d'Estat au lieu dudit sieur de Gesvre son pere le ...... jour de .............. 1606.
En l'annee 1622 il resigna ladicte charge de secretaire d'Estat a .......... Potier sieur de docquerre son Cousin qui fut receu en icelle le 15 jour doctobre 1622.471]
[472] Phelypeaux
Paul Phelypeaux sieur de Pontchartrain estoit natif de Blois et avoit eu divers emplois quand Monsieur de Villeroy le choisit pour estre son premier Commis, La reyne Marie de Medicis laggrea ensuitte pour estre secretaires de ses Commandemens, il fut le premier de ses domestiques qu'elle desira advencer dans les charges de l'Estat, s'estant servie du pouvoir qu'elle commencoit a avoir sur l'Esprit du Roy pour obtenir qu'il seroit faict secretaire d'Estat quand l'occasion s'en offriroit, laquelle se presenta en l'annee 1608.
Monsieur de fresne forget secretaire d'Estat avoit traitté de sa charge avec Monsieur de preaux. La Reyne l'ayant sceu envoya querir ledit sieur de Preaux et luy dit qu'elle le prioit de ne point s'accommoder de cette charge qu'elle [472v] desiroit faire avoir a Monsieur de pontchartrain et qu'en autre occasion plus importante elle luy en tesmoigneroit ses ressentimens. Monsieur de preaux ne pouvant faire autrement tesmoigna a la Reyne qu'il ne souhaittoit rien tant que luy plaire, et ne donna point neantmoins aucune parolle certaine de son desistement son traitté demeura toujours entieres en depost entre les mains de Monsieur jeannin ce qui donnoit lieu a Monsieur de pontchartrain de se deffier de Monsieur de preaux et d'apprehender de lavoir pour concurent. Il employa tous ses amis et son credit pres Monsieur de fresnes pour avoir sa demission laquelle il ne peut jamais obtenir. Monsieur de fresnes ayant respondu a la Reyne en termes de Civilité et de Compliment ne trouvant pas apropos de luy tesmoigner aucune [473] resistence, continua ses services jusques en l'annee 1610 qu'il tomba Malade de la maladie dont il mourut.
Si Monsieur de forget fust decedé revestu de sa charge y a grande apparence de croire que Monsieur de pontchartrain avec la faveur de la Reyne en eust esté gratiffié. Il estoit a l'extremité et ne vesquit que deux ou trois jours apres quand Monsieur de preaux qui estoit amabassadeur en flandre vint par ordre du Roy a paris pour l'affaire de Monsieur le Prince pour sçavoir de la propre bouche du Roy ce qu'il avoit affaire en une affaire de si grande importance, Monsieur de pontchartrain s'imagina qu'il estoit venu expres a Paris a cause de la malade de Monsieur forget pour avoir sa charge de laquelle il avoit autresfois traitté, et redoublant ses sollicitations pres la Reyne, et employant ses amis envers Madame forget [473v] qui voyoit que si son mari decedoit sans s'estre deffaict de sa charge elle n'en tireroit aucune recompense, il obtint la demission de Monsieur forget pour laquelle il paya les soixante mil escus pour lesquels Monsieur de preaux avoit autresfois traicté. Monsieur forget deceda le jour d'apres qu'il eust baillé sa demission.
Le voyage de Monsieur de preaux fut cause que Monsieur de pontchartrain se hasta de traitter avec Madame de Fresnes, et qu'elle toucha la recompense de la charge de son mari en quoy Monsieur de pontchartrain tesmoigna sa prudence pour ce qu'ayant de grands biens il ayma mieux advancer Lx m[ille] lt et estre assuré de la charge que d'avoir peust estre a contester avec Monsieur de preaux que le Roy affectionnoit et avoit tesmoigné du mescontentement de ce que la Reyne avoit desiré qu'il [474] se desistast du traitté qu'il avoit faict en l'année 1608 avec Monsieur forget, et luy avoit lors promis de le gratifier d'une charge de secretaire d'Estat.
Les lettres de provision de Monsieur de pontchartrain sont du 16e Avril 1610.
Il exerça la charge de secretaire d'Estat jusques au 12 jour d'octobre 1621 qu'il deceda a la suitte du Roy a Castre (18) Sarrazin en Languedoc durant le siege de Montauban.
Ses enfans apres son deceds toucherent Lx m[ille] lt de Monsieur Phelipeaux leur oncle frere du deffunct sieur de pontchartrain pour la recompense de la charge de leur pere.
Notes
8. The italicized words are not in Ms. Fr. 18236.
9. The word enfin appears here in Ms. Fr. 18236.
10. The word clearly is Atrenor in Ms. Fr. 18236.
11. The italicized word is not in CCC 136.
12. In Ms. Fr. 18236, de Beaulieu is written over the dots by a hand that closely resembles the copyist's. The space remains blank in CCC 136.
13. The italicized word is not in CCC 136.
14. The italicized word is not in CCC 136.
15. CCC 136 reads pour luy en faire les fonctions.
16. CCC 136 reads lesdicts offices.
17. Ms. Fr. 18236 is singular here: la charge.
18. CCC 136 reads Castel.